Հովհաննես Շարամբեյանի անվան ժողովրդական արվեստների թանգարանի 40-ամյակին նվիրված հանդիսույթի բացման խոսք
/2018թ., դեկտեմբեր/
Այսօր ընթացող տեխնոլոգիական փոփոխություններն արագացնում են մշակութային ժառանգության շատ արժեքների դուրս մղումը կիրառությունից:
Եվ ահա, մեր մշակութային հաստատության՝ Հովհաննես Շարամբեյանի անվան ժողովրդական...Կարդալ ավելին
Հովհաննես Շարամբեյանի անվան ժողովրդական արվեստների թանգարանի 40-ամյակին նվիրված հանդիսույթի բացման խոսք
/2018թ., դեկտեմբեր/
Այսօր ընթացող տեխնոլոգիական փոփոխություններն արագացնում են մշակութային ժառանգության շատ արժեքների դուրս մղումը կիրառությունից:
Եվ ահա, մեր մշակութային հաստատության՝ Հովհաննես Շարամբեյանի անվան ժողովրդական արվեստների թանգարանի առաքելությունն է նյութական և ոչ նյութական մշակութային ժառանգության արժեքների պահպանումը, շարունակականության ապահովումն ու հանրահռչակումը:
Երևանի և Դիլիջանի մասնաճյուղի ժողովրդական արվեստի թանգարանների հիմքը կազմում են 1930-ական թվականներին ազգագրագետ, բանահավաք Հաբեթնակ Բաբայանի ջանքերով հիմնադրված Ժողովրդական ստեղծագործության տան ցուցանմուշները: Այդ հավաքածուի հենքի վրա էլ, ՀՍՍՀ արվեստի վաստակավոր գործիչ, էթնիկ մշակույթի նվիրյալ Հովհաննես Շարամբեյանի ջանքերով, 1978 թ.-ին ՀՀ մշակույթի նախարարության կողմից ստեղծվում է Հայաստանի ժողովրդական արվեստի պետական թանգարանը:
Հավաքածուն ընդգրկում է փայտի, մետաղի և քարի գեղարվեստական մշակման, ասեղնագործության, գորգագործության, խեցեգործության նմուշներ, ինչպես նաև ինքնուս նկարիչների գեղանկարներ: Հավաքածուում առանձնակի տեղ են գրավում սփյուռքահայերի նվիրատվությունները:
Թանգարանը կազմակերպում է ցուցահանդեսներ. ժողովրդական վարպետների ստեղծագործությունների անհատական,ինչպես և թեմատիկ ցուցահանդեսներ:
Թանգարանի հավաքածուի բացառիկ ցուցանմուշները ցուցադրվել են Ռուսաստանում, Ֆրանսիայում, Բելգիայում, Իտալիայում, Հունաստանում, Ավստրիայում, Չինաստանում, Իրանում, Սիրիայում և այլուր:
Միջազգային նշանակության ցուցահանդեսներ են կազմակերպվել և մեզ մոտ՝ թանգարանում. բելառուսական ժողովրդական ստեղծագործության նմուշների ցուցահանդես-վաճառք, գերմանական ժամանակակից գոբելենի ցուցահանդես, ճապոնական կիրառական արվեստի նմուշների ցուցահանդես և այլն:
Թանգարանը կազմակերպում է տոնա-ծիսական համակարգին առնչվող հանդիսույթներ, ազգագրական երգ ու պարի համեգներ, խմբերգային և ջազային արվեստի երեկոներ, գրքերի, ալբոմների շնորհանդեսներ, ֆիլմերի դիտում-քննարկումներ և այլն:
Իրականացնում է գիտակրթական աշխատանք. գիտաժողովներ, դասախոսություններ, դասընթացներ, վարպետաց դասեր:
Առաջին անգամ Խորհրդային Հայաստանի և նորանկախ Հայաստանի պատմության մեջ, Թանգարանի նախաձեռնությամբ, Հայաստանի մշակույթի նախարարության աջակցությանբ կազմակերպվում է գորգարվեստի հիմնախնդիրներին նվիրված 2 հանրապետական և 1 միջազգային գիտաժողով:
2017 թ.-ից Թանգարանի Ժողովրդական արվեստի պահպանման և հանրահռչակման բաժնի աշխատակիցները, կառավարության՝ մարզերի զարգացման ծրագրի շրջանակներում, Սյունիքից մինչև Տավուշ. մարզերի համայնքներում իրականացնում են դասընթացներ՝ ասեղնագործություն, փայտի գեղարվեստական փորագրություն, խեցեգործություն, խաչքարագործություն, գեղանկարչություն, ազգագրական երգ ու պար: Դասընթացներում ներգրավված են 500-ից ավելի տեղաբնակ պատանիներ: Նպատակը Հայաստանի մարզերում՝ հատկապես սահմանամերձ շրջաններում ժողովրդական մշակույթի պահպանումն է, զարգացումն ու հանրահռչակումը:
Տարիքային տարբեր խմբերի համար Թանգարանն առաջարկում է կրթական դասընթացների շարք՝ գորգագործություն, կարպետագործություն, ասեղնագործություն, ժանեկագործություն և այլն:
Պատրաստում և հրատարակում է գիտական հոդվածներ, ժողովածուներ, ալբոմներ, կատալոգներ, ինչպես նաև կազմակերպության գործունեության վերաբերյալ տեղեկատվական ու գովազդային նյութեր:
Համագործակցում է կրթական հաստատությունների, զբոսաշրջության գործակալությունների, մշակութային տարբեր կառույցների հետ՝ համատեղ ծրագրերի մշակման և իրականացման նպատակով:
Հուսով եմ, որ Ժողովրդական արվեստների թանգարանը կունենա բազում-բազում հոբելյաններ նշելու տարեթվեր:
Կարինե Միրզոյան
Հովհ. Շարամբեյանի անվան ժողովրդական արվեստների թանգարանի փոխտնօրեն մենեջմենթի գծով