Հունվարի 25-ին Ժողովրդական արվեստի կենտրոնում տեղի ունեցավ «Կյանքի իրավունք․ Ղարաբաղ» գրքի շնորհանդեսը: Գրքի հեղինակն է Արթուր Ալեքսանյանը՝ Ամարասի Արթուրը, ով Արցախյան պատերազմի ժամանակ ղեկավարել է թիկունքի աշխատանքները և եղել տարբեր ստորաբաժանումների հրամանատար Մարտակերտի պաշտպանական դիրքերի Հաթերքի կիրճում: Ռազմաճակատի այդ հատվածը պաշտպանում էր Արցախի գլխավոր հոգևոր կենտրոնը՝ Գանձասար վանքը: Հենց այս հատվածում է Արթուր Ալեքսանյանը ղեկավարել Հայաստանից ժամանած և իր հրամանատարությամբ գործող «Արծիվներ» կամավորականների ջոկատները՝ «Մահապարտներ» անվանումով։ Ալեքսանյանը մի քանի անգամ ծանր վիրավորվել է, արժանացել է Հայաստանի և Արցախի բարձրագույն ռազմական պարգևների: Պատերազմից հետո նրան հանձնարարվեց կազմավորել Հայաստանում «Կարմիր բերետներ» հատուկ նշանակության ռազմական ստորաբաժանման գլխավոր վարչությունը: Ամարասի Արթուրի հերոսության մասին գրվել են գրքեր, ակնարկներ ու պատմություններ, նկարահանվել են ֆիլմեր:

Լուսանկարները՝ Գագիկ Գասպարյանի։