Օգոստոսի 17-ին լրացավ Ժողովրդական արվեստների թանգարանի հիմնադիր-տնօրեն, ՀԽՍՀ վաստակավոր նկարիչ, ՀԽՍՀ արվեստի վաստակավոր գործիչ Հովհաննես Շարամբեյանի ծննդյան 95-ամյակը: Էթնիկ մշակույթի մեծ նվիրյալի հոբելյանին նվիրված՝ Ժողովրդական արվեստների թանգարանի Դիլիջանի մասնաճյուղում տեղի ունեցավ «Հացին երգը» խորագրով միջոցառումը:
Միջոցառման խորագիրը պատահական չէր ընտրված. Շարամբեյանին շատ էր գրավում հացի ստեղծման պատմությունը։ Դանիել Վարուժանի «Հացին երգ»-ով ոգևորված՝ Հաղարծինում կառուցել էր հացատուն, ծրագրում էր վերականգնել նաև Դիլիջանի ջրաղացը, մարդկանց հաղորդակից դարձնել հացի արարման յուրօրինակ ընթացքին: Մինչև վերջ չիրականացած այս ծրագրի մի մասը Դիլիջանի ժողովրդական արվեստների թանգարանի պատշգամբի ցուցադրությունն է, ուր հավաքված են հացի ստեղծման հետ կապված պարագաներ:
Միջոցառման բացումը տեղի ունեցավ պատմամշակութային այս շենքի հենց այն հատվածում, որտեղ 1979-ին Շարամբեյանն իր խոսքն ասաց Դիլիջանի ժողովրդական արվեստների թանգարանի հիմնադրման առթիվ:
Բացման խոսքով հանդես եկան թանգարանի տնօրեն Լուսինե Թորոյանը, ՀՀ ԿԳՄՍ նախարարության մշակութային ժառանգության և ժողովրդական արհեստների վարչության գլխավոր մասնագետ Նաիրա Կիլիչյանը, պատմական գիտությունների թեկնածու, գորգագետ Աշխունջ Պողոսյանը, թանգարանի ավանդական արհեստների գիտական ուսումնասիրման բաժնի վարիչ, ՀՀ մշակույթի վաստակավոր գործիչ Օֆելյա Ասատրյանը, թանգարանի երկարամյա աշխատակից Կարինե Միրզոյանը, գեղանկարիչ, ՀՀ մշակույթի վաստակավոր գործիչ Ղազար Ղազարյանը և Հովհաննես Շարամբեյանի թոռը՝ Նարեկ Վան Աշուղաթոյանը:
Միջոցառումը շարունակվեց «Ակունք» ազգագրական համույթի՝ հացի արարման ծեսին նվիրված ելույթով:
Միջոցառման շրջանակում թանգարանի բակում անցկացվեց նաև տեղի ժողովրդական վարպետների աշխատանքների ցուցահանդես-վաճառք:
Հաջորդիվ Շարամբեյանի հյուրերն ուղևորվեցին Դիլիջանի երկրագիտական թանգարան-պատկերասրահ` նրա 95-ամյակին նվիրված ցուցահանդեսի բացմանը։