«Մանուկների գունագեղ աշխարհ». ցուցահանդես (14.01-18.01.2017)

14.01.2017

2017 թ. հունվարի 14-18-ը Հովհ. Շարամբեյանի անվան Ժողովրդական ստեղծագործության կենտրոնում տեղի ունեցավ «Deccart» կերպարվեստի և դեկորատիվ-կիրառական արվեստի կենտրոնի՝ «Մանուկների գունագեղ աշխարհ» խորագրով հաշվետու ցուցահանդեսը:
Ցուցահանդեսի ընթացքում ներկայացվեցին 5-14 տարեկան տաղանդավոր երեխաների ստեղծագործական աշխատանքները, որոնք ներառում էին գեղանկարչություն, գրաֆիկա, խճանկար և ապակենկարչություն: Յուրաքանչյուր ժանրով ստեղծված աշխատանք երեխային թույլ է տվել մուտք գործել մանուկների մի գունագեղ աշխարհ, որտեղ իրենց ջերմ մտքերով հարստացրել են ստեղծագործական միտքն ու գեղագիտական ճաշակը, ինչը նրանց օգնել է մոտ լինել արվեստին և տեսնել վերջինիս նրբությունները:

«Deccart» կերպարվեստի և դեկորատիվ-կիրառական արվեստի կենտրոնը հիմնադրվել է 2009 թ. մայիսի 1-ին՝ Օֆելյա Գոնչարովայի և Սուսաննա Բուդաղյանի կողմից: Սկզբում Կենտրոնը գործում էր «Decart մանկապատանեկան մշակութային կենտրոն» անվամբ, սակայն որոշ ժամանակ անց փոխեց իր ձևաչափը, առանձնացավ և դարձավ «Deccart կերպարվեստի և դեկորատիվ-կիրառական արվեստի խորացված ուսուցման կենտրոն», որը ղեկավարում է Օֆելյա Գոնչարովան, ով մասնագիտությամբ նկարիչ-դիզայներ է:
Կենտրոնի նպատակն է երեխաներին սովորեցնել նկարչության հիմունքները և նրբությունները, երեխաների մոտ զարգացնել գեղագիտական ճաշակ և ստեղծագործական միտք: