Գարիկ Միքայելյան. «Ճանապարհ դեպի լույս» (07.04-17.04.2016)
07.04.2016
«Խոնարհվում եմ մեր ազգի որդեկորույս մայրերին, մեր բոլոր մայրերին՝ մաղթում խաղաղություն»,- այս խոսքերով այսօր իր՝ «Ճանապարհ դեպի լույս» խորագրով անհատական ցուցահանդեսը Գարիկ Միքայելյանը նվիրեց հայ մայրերին:
Գարիկ Միքայելյանը ծնվել է 1986 թվականին, Աշտարակ քաղաքում: Ավարտել է Երևանի պետական համալսարանի ֆիզիկայի ֆակուլտետը: Ավարտել է նաև Հայաստանի պետական ճարտարագիտական համալսարանը՝ ստանալով ճարտարագիտության մագիստրոսի կոչում: Ծառայել է բանակում: Ներկայումս աշխատում է ՎիվաՍել-ՄՏՍ-ի Տեխնիկական վարչությունում: Սկսել է նկարել 2010 թվականից: Իր վրձնած առաջին գործը կոչել է «Ճանապարհ դեպի լույս». առաջին ցուցահանդեսն էլ որոշեց այդ խորագրով ներկայացնել:
Ժողովրդական ստեղծագործության կենտրոնի տնօրեն, բանաստեղծ Հովիկ Հովեյանը նշեց, որ իրենց համար անակնկալ էր Գարիկի համարձակությունը և ուժգին սերը գեղագիտության նկատմամբ: «Գեղագիտության փնտրտուքի ճանապարհին ձևաչափն այնքան կարևոր չէ, որքան ցանկությունը, որի շնորհիվ Գարիկ Միքայելյանը ոչ մի խոչընդոտի առջև չի կանգնել և այսօր մեր զորաբանակում է՝ որպես լիարժեք անդամ»,- նշեց Հ. Հովեյանը:
Երևանի գեղարվեստի պետական ակադեմիայի ռեկտոր, ՀՀ արվեստի վաստակավոր գործիչ Արամ Իսաբեկյանը վերջերս է ծանոթացել Գարիկի հետ. «Երբ տեսա նրա աշխատանքները, հասկացա, որ գործ ունենք հետաքրքիր անձնավորության հետ: Ինձ ամենից շատ ոգևորում է այն անկոտրում ոգին, որն ունի Գարիկը: Եվ հենց այդ ոգեղենությամբ նա, հաղթահարելով շատ դժվարություններ, սկսել է նկարել, և ես ասում եմ, որ պետք է շարունակի նկարել»:
Նկարիչ Տիգրան Մատուլյանն էլ, շնորհավորելով հեղինակին, նշեց. «Հերոսությունը վերջանում է այնտեղ, որտեղ վերջանում է սերը: Գարիկի ստեղծագործություններում մենք տեսնում ենք սեր և ուժ: Նա սիրով է նկարում: Մաղթում եմ, որ անսպառ լինի նրա սերը կյանքի հանդեպ»:
Ցուցահանդեսի խորագիրը, այս դժվարին օրերին, հանրությանը ուղղված գաղտնագիր է, որը դիտողին լույսի արահետով տանում է դեպի խաղաղ ու ապահով աշխարհ:
Ցուցահանդեսը հանրությանը հասանելի կլինի մինչ ապրիլի 17-ը:
Հասցե` Երևան, Աբովյան 64
Հեռ.` + 374 10 56 93 80
Էլ. փոստ՝ info.folkartcenter@gmail.com
